State thenkhatin Maggi hralhchhuah an khap
Nestle instant noodle, Maggi chu taksa tana him tawk loa puh a nih hnuah, state hrang hranga mi a sample test mek a ni a, test tam zawkah phal chin aia tam lead hmuh a ni. Hei vang hian state eng emaw zatin Maggi hralhchhuah hi an khap tawh a ni.
Delhi sorkarin Maggi noodle sample 13 a test tir aṭangin 10-ah chuan lead awm zat chu taksa tana him tawka ngaih chin aiin a sang vek tih hmuhchhuah a ni. Hei vang hian Delhi sorkar chuan Delhi khawpuiah Maggi hralhchhuah a khap nghal.
Uttar Pradesh-a food safety authority-te'n Laboratory test-ah Maggi noodle-ah hian danin a phal chin aia tam lead a awm tih a hmuchhuah avangin sorkar laipui chuan state hrang hrang amite chu a sample endik vek a nih tur thu a lo sawi tawh a ni. Hei bakah hian he noodle-ah hian ingredient list-a ziahlan tel loh, a tihtuina turin monosodium glutamate/MSG (hmehhan) hmuh tel a ni bawk. Health expert-te chuan MSG (hmehhan) hi restaurant-ahte pawh an hmang fo tih sawiin, ei ngun chuan nervous system thlengin a tichhe thei tih an sawi.
UP-a test neihah hian Maggi noodle-a lead awm zat chu 17.2 parts per million a tling tih hmuhchhuah a ni a, hetihlai hian danin a him tawk nia ngaia a phal chin chu 0.01-2.5 ppm chauh a ni thung.
Maggi a him tawk lo tih hmuhchhuah a nih hnu hian Nestle India share pawh 10% in a tlahniam nghal a ni. Maggi noodles hi rampumah a lar hle a, a bikin school leh college naupangte'n an ei nasa hle. Kum khatah ramchhunga a hralhchhuah hi cheng tluklehdingawn 15 man vel a ni.
Delhi khawpuia test zinga a tam zawkah a him tawk lo tih hmuhchhuah a nih avangin Delhi sorkar chuan Nestle India lakah hian thubuai thehluh a tum a, nimin khan company official-te meeting a neihpui a ni.
Kerala sorkar pawhin an state chhunga Maggi noodle hralhchhuah a khap a, state sorkar hnuaia grocery store 1,000 chuangte pawhin an Maggi hralhchhuahte hi an lakir leh mek a ni. State dang 10 velin Maggi hralhchhuah hi an khap tawh nia sawi a ni bawk.
Haryana, West Bengal leh Maharashtra sorkar pawhin Maggi noodle sample hi an test mek bawk. Food regulatory body chuan ramchhunga state zawng zawngte chu dawra an zawrhchhuah sample test a, report thehlut turin a ti. State hrang hrang-a test report hi tunkar chhung hian an dawn kim theih beisei a ni a, report a luh kim hunah a ṭul dan anga action lak a nih tur thu a sawi.
Hetihlai hian Thawhṭannia Nestle India thuchhuah chuan an hmanruaah hian lead a awm leh awm loh hi laboratory rintlak takah regular taka an test ṭhin thu leh, Maggi Noodles-ah pawh lead awm zat hi danin a phalsak chin a ni tih a tarlang.
Lead hi tam tak ei tel a nih chuan kal, ruh leh nervous system te a khawih chhe tel a, a bikin zirlai tan a hlauhawm a, thil zirna lamah harsatna a thlen thei a ni.
Nestle India chuan sorkar laipui leh state sorkar-a FDA authority hnen aṭangin Maggi pekchhuah tawh la let tura hriattirna a la dawng lo tih a sawi. Mahse nimin aṭang khan Kishore Biyani kaihhruai Future Group chuan an retail store-a maggi an zawrh chhuah chu a titawp rih a, thuneitute thu an nghak rih dawn tih an sawi.