India leh China inremna siamin kawng dik a zawh zel: Jaishankar

External affairs minister(EAM) S. Jaishankar chuan India leh China-in Line of Actual Control (LAC)-a friction pahnih, Depsang Plains leh Demchok-a patrolling chungchanga inremna an siam chuan kawng dik zawhin, hmasawnna a thlen thu a sawi.

Jaishankhar hian ram pahnihten inremna an siam hnuah hemi chungchang hi a vawi khatna atan Thawhlehnia Parliament inkhawmah a sawi a ni. India Army leh People's Liberation Army(PLA) ten Demchok leh Depsang aṭanga sipaite hnuhdawk an remtih hnu hian, ramria boruak sang tak ṭhin chu a ziawm tawh a ni, a ti.

China leh India-in a inkar boruak siamṭhat tuma inbiakna an neih tawhte tarlangin, kum 2022 September aṭang khan Working Mechanism for Cooperation and Coordination(WMCC) ah hian ṭum 17 meeting awm tawhin Senior Highest Military Commanders meeting(SHMC) huangah ṭum 21 meeting neih a ni tawh tih a sawi.

Jaishankar chuan LAC huam chhunga boruak sosanna lai ṭhinah hmasawnna a awm thu sawiin, ramri huam chhunga ralmuanna a awm zel theih nan ram pahniha special representatives and foreign Secretary-te pawh an in hmuh thuai tur thu a sawi bawk.