SC/ST Act hmanga thubuai ziahluh a pung: Social Justice Minister

Social justice minister Virendra Kumar chuan Thawhlehni khan Lok Sabha ṭhutkhawmah, in zirtirna leh hrilhhriatna ṭha tak awm zel hnuah leh police hna thawk dah belh zel chuan ram pumah Scheduled Caste(SC) leh Scheduled Tribes(ST) (Prevention of Atrocities)Act hmanga thubuai ziah luh a pun thu a sawi.

National Crime Record Bureau(NCRB) data in a tarlan danin, kum 2022 khan SC/ST Act hnuaiah SC leh ST te laka hleilenna leh pawikhawhna thleng vangin thubuai 67,000 ziah luh a awm. Hei hi 2013 hnua he Act hnuaia thubuai ziah luh tam ber ṭum a ni.

Heng thubuai ziah luh zinga case 57,582 hi SC mite laka beihna chungchang niin, ST te laka hleilenna kaihhnawihah hian case 10,064 an ziak lut tawh bawk. Sorkar chuan National Commission for Scheduled Castes and Scheduled Tribes chu SC leh ST te laka hleilenna leh tih duhdahna thleng ṭhin vengtu a nih thu sawiin, "Vantlang hmasawnna, venhimna bakah zirna, hnam ziarang leh nunphung te chu tih hmasawn a tum a ni" a ti.

Sorkar chuan SC leh ST te venhimna tur hian Protection of Civil Right Act of 1955 leh Scheduled Castes and Scheduled Tribes (Prevention of Atrocities) Act of 1989 siam a nih thu a sawi. Heng dante hi awmze nei zawka hman a nih theih nan Department of Social Justice and Empowerment chuan central sponsored scheme leh National Helpline Against Atrocities te a siam thu a tarlang bawk.