Maharashtra CM atan Davendra Fadnavis lak luh a ni

Maharsahtra assembly inthlanah BJP kaihhruai Mahayuti ṭangrual pawlin hnehna an chan hnuah, ṭangrual sorkar thara chief minister turin BJP aiawh, Davendra Fadvanis chu nimin tlai dar 5:30 khan Mumbai-a Azad Maidan-ah lak luh a ni.

Hun rei tak chief minister tur hi thlang fel thei loa an khawtlai hnuah, BJP hruaitute chuan Fadvanis hi an ruat. Nilaini khan Maharashtra BJP legislature party leader atan party MLA-te chuan lungrual takin an thlang ta a ni.

Nimin tlaia CM thar lak luh rual hian deputy chief minister atan Shiv Sena hruaitu, CM kalchhuak Eknath Shinde leh National Congress Party (NCP) hruaitu Ajit Paward pawh lak luh an ni ve nghal.

Fadnavis leh Pawar hi Shinde CM-na hnuaiah deputy CM an lo ni ve ve a, Fadnavis hi Maharashtra CM a nih ṭum thumna tur a ni bawk.

Nimina Maharashtra CM thar lak luh inkhawm hi prime minister Narendra Modi, union home minister Amit Shah, BJP chief JP Nadda bakah union minister, BJP, Shiv Sena leh NCP hruaitu eng emaw zatin an telpui a ni. Azad Maidan-ah hian venhimna khauh taka kalpuiin, venhimna hna thawk turin police pawh 4,000 chuang dah an ni.

BJP kaihhruai Mahayuti ṭangrual pawlah hian Shiv Sena leh NCP hi telin, Assembly seat 288 awmah member 232 an nei. BJP hian seat 132 neiin, Shiv Sena-in 57 leh NCP hian seat 41 an nei. An thawhpui dang party tenau pahnihte chuan seat khat ve ve an nei bawk.

CM thar Fadnavis hian a cabinet member turte pawh a ruatfel thuai beisei a ni. Maharashtra sorkarah hian minister 43 an awm thei a ni.