World Bank-in Maharashtra tan loan dollar mtd 188 pawm

Maharashtra-a district hnufualte dawmkan leh tih hmasawnna turin World Bank chuan loan, USD mtd 188.28 pek a remti.

He loan hi International Bank for Reconstruction and Developement (IBRD) aṭanga pek chhuah tur niin, kum 15 chhung tana tih a ni a, kum 5 ngaihhnathiamna a awm dawn bawk a ni.

Loan hi Maharashtra Strengthening Institutional Capabilities hnuaiah district hrang hranga hmasawnna hna thawhna tur leh duan chhuahna tur kawng atana tih a nih thu bank lam thuchhuah chuan a tarlang.

Loan pek chhuah hmang hian private sector pawh huamin, e-government hnathawh kaltlanga sumdawnnate chu district chhungah tih hmasawn a ni thei dawn a, khualzin hip thei turin tourism huang chhungah hmasawnna thlen tel thei tura ruahman a nih thu tarlan a ni bawk."Mumal taka investment kalpui bakah, zirchianna awmsa hmanga planning leh policy siam te, public leh private sector thlenga hmasawnna a awmna turin district hnufual te ah ruahmanna siam a ni" tiin World Bank Country Director for India Auguste Tano Kouame chuan sawi.

Project Task Team Leader Neha Gupta leh Thomas Danielewitz te chuan he hmalakna hian Maha Databank behchhanin state hmasawnna turin hna a thawk dawn a, hei hian thawh hona, hmalakna, zirchianna, leh darh zau zawka hmasawnna a thlen beisei a nih bakah, heng kaltlang hian hmasawnna in kar zau zawng pawh awlsam taka hriat a nih theih tur thu an sawi a ni.