Parliament thlasik ṭhutkhawmah bill pathum pawm tawh

Parliament thlasik ṭhutkhawm neih mekah rorel mumal thei loa eptute an aubuai chungin, bill pathum chu pawm a ni tawh.

Lok Saba-ah Banking Law(Amendment) Bill 2024 pawm a ni a, Rajya Sabha-ah Oilfields(Regulation and Development)Amendment Bill, 2024 leh Boilers Bill, 2024 pawm ni bawk. Boilers Bill, 2024 hi British awpna hnuaia awm lai aṭanga hman tawh, kum 100 chuanga upa Boilers Act of 1923 thlakna tura tih a ni.

Parliament in hnihah hian ṭhutkhawm neih a nih tirh aṭangin eptute aubuai avangin rorel mumal thei loin an awm a, inkhawm pawh tum eng emaw zat tih tawp lailawk a ni tawh bawk. Parliament ṭhutkhawm hi December 20 thleng neih tura ruahman a ni.

Congress MP-te chuan sumdawng lian, Adani Group chungchang ngaihtuah turin sorkar lam an nawr na hle a, an thil ngen hi phalsak an nih ṭhin loh avangin lungawi lohna lantirin sorkar laipui chu Parliament a sawihona nei ngam lo leh tlanchhiaah an puh. Ngaihtuah ho tura an duh hi rampum nghawng thil a nih thu an sawi. Hei bakah Congress MP te hian loneitute harsatna ngaihtuah sak loha sorkar puhin House aṭangin an chhuak tau bawk.

Eptu lamin harsatna a thlen chungin nimin khan Lok Sabha rorel chu chhunzawm niin Railways (amendment)Bill, 2024 pharh a ni. Union home Minister Amit Shah pawhin Disaster Management (Amendment)Bill, 2024 chu Disaster Mangement Act, 2005 thlakna turin a pharh a, hetih lai hian Rajya Sabha ah pawh The Bharatiya Vayuyan Vidheyak, 2024 pawh ngaihtuah ho tur tih a ni bawk a ni.