Chhattisgarh-a helpawl leh sipai inkahnaah head constable thi

Chhattisgarh-a Narayanpur district-ah Naxal hel nen an inkahnaah Nilaini khan District Reserve Guard(DRG) head constable a thi.

He inkahna hi Sonpu ramri leh Kohkameta police station inkarah zing kar dar 1 vela thleng a ni. DRG leh Border Security Force (BSF) thawk dunte chuan Thawhlehni aṭang khan Naxal hel laka beihpui thlak hna hi an thawk a, helpawl lamin an lo kah let naah head constable hian nunna a chan ta tih official chuan a sawi.

Hel hoin an kah hlum hi Birendra Kumar Sori(36) , DRG Narayanpur Head Constable niin Sori hian Narayanpur district police hi 2010 khan constable in a zawm a, 2018 khan head constable ah hian a kaisang a ni. Anti-Naxal operation ah hian a huaisen zia a lan tir thu official chuan a sawi. Sipaite hian ramhnuaiah hian hel ho zawn hi an thawk zui nghal a ni.