Loneituten tear gas hman a nih hnuah 'Delhi Chalo' kawngzawh an ti tawp lailawk

Samyukta Kisan Morcha (non-political) leh Kisan Mazdoor Morcha hminga Punjab-a loneitu pawl hrang hrangin sorkar laipuia an thil nawrte tih hlawhtlin a nih theihna atana Delhi khawpui pana kawngzawh, Chalo March an neih chu Haryana Police-ten tear gas nena an lo dan avangin nimin khan an ti tawp lailawk.

Delhi pana loneitute kawngzawh lo danna atan hian Haryana police-te chuan tear gas an hmang a, loneitu pawl hruaitu zingah mi eng emaw zatin hliam an tuar a ni. Hei vang hian kawngzawh hi chhunzawm loin an tawp rih a ni. Nimina Delhi khawpui chhung luh hman an tum chu an thei ta rih lo.

Loneituten Delhi thlenga kawng zawh an tum avang hian Singhu ramri bakah Punjab leh Haryana ramriahte venhimna khauh taka kalpui a ni. Uttar Pradesh-a loneituten kawng zawh hi thlawp an tum avangin Noida ramri bulah pawh venhimna hi tih belh a ni bawk. Loneitute hian an thlai thar hralhna turah ssorkar chu minimum support price mumal tak siam turin an phut a, February 13 leh 17 khan an thil phut nawrin Delhi-ah hian kawng zawh huaihawt hi an lo tum tawh bawk a ni. Hei bakah hian an leiba ngaihdam te, pension siam leh kawlphetha man tih san loh te chu an thil ngiat lian tham zingah an tel. Hei bakah hian 2021- a Lakhinpur Kheri-a buaina chhuaka nunna chan, loneitute chhungte hnenah zangnadawmna pek leh, Land Acquisition Act, 2013, hman nawn leh te chu phut zingah hian a tel.