India-ah Russian firm ten thilsiam chhuah an in peih: Putin

Russia president Vladimir Putin chuan prime minister Narenra Modi kaihhruai sorkarin "Make in India' policy a duan chu ṭha a tih thu sawiin, Russia a company liante chuan India ramah thilsiam chhuahna din an in peih thu a sawi.

Vladimir Putin hian Moscow-a 15th Vneshtorgbank(VTB) Investment Forum, Nilainia neiha thu a sawinaah he thu hi a sawi chhuak a ni. India sorkar ruahmana siam hi a ram a thil siamchhuahna hmunte tih lenna leh, ram dangte hipluhna tur a ni tiin, khawvel huap a India economy dinhmun chawisanna tura thil pawimawh tak a nih thu a sawi a ni. Russia chuan India-a thil siamchhuahna neih chu a in huam hle a, India-a investment tihna remchang a ni a ti bawk.

'Make in India' policy hi September 25, 2014 aṭang khan kalpui ṭan niin, he policy kaltlang hian India chu investment tihna hmun lian, thil duan chhuahna hmun, khawvel deng chhuak infrastructure ṭha siamna hmun leh,India chu thil siamchhuahna, design leh thil thar siamna hmunpuia siam tum a ni.

Russia President chuan sawi belhin," Prime Minister leh sorkar kaihhruaina in India chuan thil siam chhuah leh hmasawnna kawngah a dinhmun a sawh nghet zel a, hengte hi India dah pawimawh hmasakna policy awm vang a ni. Heng te vang hian India a investment tih chuan hlawkna min pe thei dawn a ni" tiin "tunah hian India-a thil siam chhuahna din kan inpeih tawh a, chu mai ni loin investment lian ber, dollar vbc 20 chuang man Rosneft investment pawh kan lo kalpui tawh a ni" a ti. Rosneft hi Russia rama oil siamchhuaktu company lian ber a ni.