Hashimpura massacre case-a thiam loh chantir 8-te bail phalsak

Supreme Court of India chuan kum 1987-a Hashimpura inthahna rapthlak tak thlenna, Hashimpura massacre case-a mi 38 thihna chungchanga thiam loh chantir mi pariatte bail dilna chu a phalsak.

Hashimpura insuatna hi May 22, 1987 a thleng niin, Provincial Armed Constabulary (PAC) mi leh sate chuan Meerut, Uttar Pradesh-a buaina chhuakah Hashimpura-a Muslim mipa 50 vel an man in. An mi mante hi khawdaiah hruai chhuakin, silaiin an kap a, an kah hlumte ruang hi tuichhe paihna hmunah an paih zui bawk. PAC te kahna avang hian mi 38 in nunna an chan a, hetih lai hian an zinga panga chu dam chhuakin, an thil tawn rapthlak hi an sawi chhuak a ni

Thiam loh chantirte bail dilna hi Justice Abhay S. Oka leh Augustine George Masih te ṭhutna bench chuan ngaihtuahin, dilna thehlutte mi palite chu senior advocate Amit Anand Tiwari-a'n a din sak a ni. Heng mite hi High Court in thutlukna a siam hnuah jail-ah kum ruk chuang an awm tawh tih a sawi a, hei bakah trial court-in thiam a chantir tawh niin a sawi bawk.

Senior Advocate chuan mi palite hi High Court chuan behchhan dik tawk lo a hman vangin thiam loh an chang nia tarlangin, an chungthu relsak a nih hnu hian kum ruk chhung lungin ah hun an hmang tawh bawk niin a sawi. Bench chuan a ngaihtuah hnuah, bail-a chhuah an dilna hi a pawmsak ta a ni.