India ramah Covid-19 kai punna tam belh zel

Ministry of Health and Family Welfare-in nimina report an tihchhuahah chuan ni khata hri kai hmuh chhuah thar 96,551 an awm leh a, India rama ni khata hri kai hmuh chhuah thar tam ber ni a thleng leh a ni. 

Nimin sorkar report tihchhuah thleng khan ram pumah hri kai hmuh chhuah 45,62,414 an awm tawh a, darkar 24 chhungin hri kai enkawl dam 70,880 awm lehin hei nen hian hri kai dam leh tawh 35,42,663 an awm. Mi 1,209-in an thihpui leh a, hri vanga thi 76,271 awm tawhin hri kai mek 9,43,480 an la awm.

Enkawl dam rate hi 77.65% a ni a, thihpui rate chu 1.7% a ni thung. Hri kai mek rate hi 20.68% a ni a, hri kai mek aiin enkawl dam tawh a let 3.8-in an tam tawh zawk.

India chu khawvela hri kai hmuh chhuah tam ber dawttu ram  ni mah se, he hri vanga thi, mortality rate erawh chu hri kai tamna dang ram dangte aiin a hniam hle. 

India rama mortality rate 1.7%  a nih laiin, US mortality rate chu 3% a nia, UK 11.7% niin Italy-ah hripui thihpui zat chu 12.6% a tling bawk. 

Sorkar chuan hri kai an pun zel ruala thihpui an tlemna chu hri dona kawnga an hlawtlinna pakhat niin a sawi a, prime minister Narendra Modi chuan mortality rate hi 1% aia tlem a nih theih thuai a beisei thu a lo sawi tawh bawk.

Hetih lai hian state hrang hrang zingah Punjab chu hri thihpui tamna, mortality rate sanna ber a ni tawh. Punjab-ah hian Maha­rashtra mortality rate 2.90% pelin, an state-a hri thihpui hi 2.95% an tling tawh a ni.  

Indian Council of Medical Research (ICMR) chuan nimina report an tihchhuahah Ningani khan sample 11,63,542 an endik leh tih tarlangin nimina report an tihchhuah thleng khan sample 5,40,97,975 lai an endik tawh a ni. 

ICMR hian ramchhung hmun hrang hrangah laboratory pawmpui 1697 an nei tawh a, chung zinga 1,046 chu sorkar laboratory niin 651 chu private laboratory a ni thung.