PM Kishan Nidhi budget ti pung turin Finance Minister ngen
Union finance minister Mirmala Sitharaman chuan loneitu pawl, agriculture based industries leh agricultural economist te chu Inrinni liam ta khan New Delhi-ah pre-budget meeting a neihpui a, loneitute chuan PM Kishan Samman Nidhi buget chu tipung turin an ngen.
Loneitute chuan PM Kishan Samman Nidhi hnuaia ṭanpuina awm ṭhin chu Rs 12,000 a ti pung tur leh, lo neih tih hmasawnna tur hmanrua hrang hrang leina atana chhiah chawi awm ṭhin te chu tih tlem sak turin an ngen nghal bawk.
Meeting-ah hian Samyukt Kisan Morcha-Non Political(SKM-NP) leader Sharmendra Malik chuan sorkar laipui chu agricultur sector chu hun rei tak a ngaihthah tawh tih sawiin thlai chi, leiṭha, hlo tur, hnathawktu leh power te chu a hun takah hman tur a awm lo ṭhin tih a sawi. Minimum Support Prise(MSP) chuan an senso a phuhru zo tawk lo niin a sawi a, MSP hnuaia thlai thar chhuah puitu chu huang zau zawka siam turin leh PM Kishan Samman Niddhi ṭanpuina tuna Rs 6,000 ni ṭhin chu Rs 12,000 ah pun ṭha a tih thu a sawi.
Sangh Parivar-in a thlawp, Bharatiaya Kisan Sangh hruaitu Badri Narayan Chowdhury chuan memorandum a thehluhah, kum ruk liam ta chhungkhan Kisan Nidhi ṭanpuina chu tih pun a nih loh thu a sawi. Sorkar laipui chu Good and Services Tax (GST) an lak aṭangin loneitute mamawh pe chhuak turin a phut a, company kaltlanga transfer ṭhin fertiliser subsidy te chu lo neitute tana hlawkna dawn theih tura direct transfer turin a phut bawk. Kisan Sangh chuan natural farming policy chu an thlawp thu leh heng policy tih chak nan hian ranvulh te chu hmang ṭangkai turin sorkar a duh tih a sawi bawk a ni.
Industries lam chuan agriculture hmanrua hrang hrang leiṭha, thlaichi, leh damdawiah te chhiah ngaihhnathiam turin an ngen. PHD Chamber of Commerce and Industry chuan sorkar laipui chu heng pesticide aṭanga GST a lak, 18% chu 5% a tihniam turin an ngen a, agribusiness committee chairman RG Agarwal pawhin dan loa pesticide hralh leh zawrh awm ṭhinah hmalakna nei thuai turin a phut bawk.