State hrang hrangin Maggi noodle enfiah mek

Nestle India siam, Maggi noodles buaina chuan ziaawm lam a la pan thei lo a, National Consumer Dispututes Redressal Commission leh central food regulatory authority, FSSAI hnena complain thehluh a nih hnuin, state zawng zawng aṭangin enfiah turin maggi sample hi lak vek a ni.

Maggi noodles-ah hian danin mihring taksa atana him tawk tura ngaiha a phal chin aia tam lead hmuh a nih bakah, a tihtuina turin monosodium glutamate MGM (hmehhan) telh tih hmuhchhuah a ni.

Retailer-te chuan maggi packet an zawrhte chu an lakir ṭan tawh bawk.

Indian Army pawhin thu­chhuah siamin, an mi leh sate chu Maggi ei lo turin a hriat­tir a, sipai canteen-te pawh maggi stock sa an neihte pawh thuchhuah a awm leh hma chu hralh chhuak tawh rih lo tura hriattir an ni. Ramchhungah sipai canteen 1000 chuang a awm.

Delhi sorkar chuan Maggi hi ni 15 chhung hralhchhuah a khap bakah, a siamtu Nestle India lakah thubuai thehluh a tum bawk.

Delhi-ah hian sample 13 test aṭangin 10-ah chuan phal chin bak aia tam lead a awm tih hmuhchhuah a ni a, sorkar chuan maggi bakah noodles brand dang pawh enfiaha, a ṭul anga action lak a tum thu a sawi. Maggi sample test result chungchangah hian Nestle India official-te chuan Delhi Health Minister Satyebdra Jain chu Nilaini khan hmuin an insawifiah a, mahse Delhi sorkar chuan an insawifiah danah a lungawi loh avangin nimin khan ni 15 chhung atana khapna thupek a tichhuak.

Haryana, Punjab, Tamil Nadu, Telangana, West Bengal, Himachal Pradesh, Meghalaya, Maharashtra leh Assam-te chuan maggi sample an enfiah tir mek a ni. Hetihlai hian Goa sorkarin sample a enfiah chu ei atana him tawk tih hmuhchhuah a ni thung.

West Bengal sorkar chuan Maggi noodles bakah hian company dang siam snack-te pawh test a tum tih a sawi. State Consumer Affairs Minister Sadhan Pande chuan, "Kurkure leh Lays chungchangah pawh complain kan dawn avangin hengte hi kan test tel vek dawn a ni," a ti.