Modi-a'n high speed train hmasa ber a vailiam dawn

Prime Minister Narendra Modi chuan karleh khian India semi high-speed train service hmasa ber tur, Gatimaan Express a vailiam dawn. Rel chak chi hi Delhi leh Agra inkara tlan tur a ni a, darkar khatah kilometre 160-a chakin a tlan thei dawn a ni.

Thawhlehni khan Gatimaan Express enchhin vawi rukna leh enchhin tawpna ber neih leh a ni. He rel hi 5,400HP electric locomotive-a thuam niin, tunlai hmanraw changkang hmanga pindan chei 12 a awm ang. Enchhinnaah hian zing dar 11.15 ah New Delhi station a chhuahsan a, kawng lakah ding loin chawhnu dar 1.10-ah Agra Cantonment station a thleng a, mahse ruahman lawk aiin a thlen hun hi minute 10-in a tlai. Chawhnu dar 2.20 ah Agra hi chhuahsanin, tlai dar 4.25-ah Delhi a thleng leh a ni.

Gatimaan Express tlan dan tur leh a chuan man turte hi railway thuneitute'n an siam fel tawh bawk. Tuna railway-in rel a neih zinga tlan chak ber, Bhopal Shatabdi aiin a chuan man hi 25% in tihsan a ni ang.