Parliament-ah bill pathum pawm

Parliament thlasik ṭhutkhawm chu nimin, Thawhṭanni khan a kar thumna atan neih chhunzawm leh a ni a, rorelna an nei mumal hlei thei lo chungin bill pawimawh pathum - Railways(Amendment) Bill, 2024, Disaster Management(Amendment)Bill, 2024 leh Banking Laws(Amenment) Bill, 2024 an pawm .

Nimina Parliament inkhawmah hian eptu MP-ten lungawi lohna an lantir chhunzawm avangin Lok Sabha rorel inkhawm chu ṭum thum tih tawp lailawk a ni a, Rajya Sabha pawh chawhnu dar 3 thleng tih tawp a ni bawk.

Parliament thlasik ṭhutkhawm hi November 25 khan nei ṭanin, December 20 thleng neih tura ruahman a ni. Thlasik ṭhutkhawm hi kar hnih chuang neih a nih tawh chhungin in aubuai leh lungawi lo awm avangin rorelna hi mumal taka neih theih a ni lo a, rorel inkhawm pawh tih tawp a ni fo a ni. Buaina awm tam zawk hi Manipur tualchhung buaina thleng mek, Adani chungchang, leh Sambhal-a tharum thawhna thleng chungchang ngaihtuah phuta eptu MP-te an aubuai vang a ni. Eptu lam aubuai vanga rorel mumal thei loa an awm chhanah BJP lam chuan Leader of Opposition Rahul Gandhi chu a mawhphurtuah an ngaih thu an sawi a, eptu leh rorel lamte hi economy ti buai leh democracy ti ṭhuanawpah hian in an puh tawn bawk.

INDIA bloc party MP te chu nimin khan Parliament complex-ah Adani Group buaina chungchang chhui chiang tura Joint Parliamentary Committee (JPC) din phutin an kal khawm a, an au rual leh bawk. He hunah hian Rahul Gandhi bakah Congress party president Mallikarjun Kharge te pawh an tel a, 'Modi leh Adani te chu ang khat a ni" ti te in an aurual a ni. Lungawi lohna lantirnaah hian Trinamool Congess, Samajwadi Party leh Aam Aadmi Party MP te erawh an tel lo.