Syria-a India mi cheng te an him : Sorkar laipui

Syria Islamist helpawl, Hayat Tahrir al-Sham (HTS) in an ram president Bashar al-Assad kaihhruai sorkar paihthla a, an ram khawpui Damascus an thunun hnuah Syria rama India mi awmte dinhmun chu sorkarin ngaihven nghalin tun dinhmunah chuan an him tawk niin sorkar laipui chuan a sawi.

Sorkar chuan Syria-a India mi awmte chu ngaihven leh buaipui turin Indian embassy chuan hma a la reng tih a sawi. Sorkarin a tarlan danin, Syria-ah hian India mi 90 awmin, an zinga mi 14 chu UN mission hnuaia thawk an ni.

Ministry of External Affairs (MEA) chuan sorkarin hriattirna dang a tih chhuah leh hma chuan India mite chu Syria rama zin lo turin a lo chah tawh bawk. Hei bakah Syria-a India mi awm mekte pawha a theih chuan commercial flight hmanga Syria chhuahsan turin a ti a ni. Syria sorkar paihthlak a nih hnuah, Pathianni aṭang khan Damascus international airport-ah thlawhtheihna service chu tih tawp rih a ni.

MEA chuan Syria ram dinhmun chu an thlithlai reng tih sawiin, remna leh inpumkhatna a awm leh thuai theihna tura party hrang hrangte an thawh ho a ṭul thu a sawi.