Delhi sikul 40-ah bomb hmanga in bumna thleng

Delhi-a sikul 44-ah bomb awm a insawiṭhaihna a thleng a, hei vang hian sikul naupangte pawh in lamah haw tir an ni.

Police-te chuan he inbumna hi email hmanga thawn darh niin an sawi a, sikul te hi enfiah nghal niin bomb leh a kaihhnawih thil engmah hmuh a nih loh thu Delhi police PRO Sanjay Tyagi chuan a sawi.

Department lam chuan sikul hrang hrangah hian venhimna khauh tak an nei nghal niin an tarlang bawk. Bomb awm anga sawiṭhaih zingah hiani Delhi Public School RK Puram leh GD Goenka School, Pashim Vihar te pawh an tel.

Email hi Pathianni zan dar 11:38 vel khan thawn chhuah niin,"Bomb chu lian lo tak uluk taka thuhruk a ni" tiin an ziak a, pawisa dollar 30,000 pek a nih loh chuan bomb hi tih puah a ni ang tiin a ziak tel bawk. "Bomb hian building ah chhiatna nasa tak a thlen theih bakah mi tam takin hliam an tuar bawk ang" tih te in an ziak bawk a ni.

Bomb awm anga invauna thu thawn hi hriat a nih veleh Delhi Fire Department ah hriattir nghal niin fire official-te chuan bomb detection team, local police leh ui sathiam te nen sikul hi rang taka thlengin an enfiah nghal a, thil hlauh thawnawm engmah hmuh a ni lo.

Delhi CM hlui Arvind Kejriwal chuan Delhi khawpui chhungah dan leh thupek kenkawhna ṭha lo leh mumal lo avanga a lawm loh thu sawiin, union home minister Amit Shah chu he thil thleng sawifiah tur hian a phut bawk. " Delhi mipui te hian hetiang em ema dan leh thupek kenkawh ṭhat lohna hi tun hmain an la hre ngai lo. Amit Shah hian a chhan chiang takin a sawi ngei tur a ni" tiin X ah a tarlang.