Nestle CEO-in Maggi a him tawk niin a sawi FSSAI-in Maggi lakir turin company hriattir

Nestle India siam, Maggi instant noodle chu taksa tan a him tawk lo nia sawi a nih vangin state eng emaw zatin hralh chhuah an khap tawh a, state ṭhenkhatin an enfiah mek bawk.

Nestle global CEO Paul Bulc­ke chuan Maggi noodles hi ei turin a him tawk tiin nimin khan a sawi a, hetihlai hian cen­tral food safety regulator Food Safety and Standards Au­thority of India (FSSAI) chuan company hnenah hian Maggi noodles hralh tura an pekchhuah tawhte chu lakir vek turin a hriattir thung.

FSSAI chuan Maggi noodles chi hrang pakuate chu mihring ei tana him tawk lo leh hlauhawma an ngaih thu an sawi a, hengte hi a siam, rampawn lam aṭanga lakluh leh hralhchhuah tihtawp nghal turin Nestle India a hriattir. Maggi noodles test ṭhenkhatah danin a phal chin aia eng emaw zata tam lead hmuh a nih bakah, a tihtuina turin hmehhan, mono-sodium glutamate (MSG) telh a nih tih hmuhchhuah a ni.

Ningani zan, zanlai aṭang khan Nestle chuan India rama zawrhchhuah tura Maggi noodle a pekchhuah chu a titawp lailawk a, mahse zawrh chhunzawm leh thuai a tiam. Bulcke chuan ni­mina press conference a neihah, company chuan ni reivaklo kaltaah khan noodles batch 1000 chu a enchhin a, an en­chhinte hi a result a ṭha vek a, ei atana him tawk vek an ni, a ti. Khawvel hmun hrang hranga an zawrhchhuahna turah quality leh safety standarh ang khat vek an hmang tih a sawi bawk.

Bulcke chuan India rama Maggi noodles an enchhinte chu a him tih hriat ni mah se, company chuan noodles chu a lakir dawn tho tih a sawiin, "Hei hi customer te'n hlauhthawnna an neih vang a ni. Company chuan customer-te rinngamna neih hi a dah pawimawh ber a ni," tiin, harsatna an tawh mek chu chingfel turin theihtawp an chhuah dawn tih a sawi. Bulcke chuan an company laboratory leh laboratory dangah test result inan loh chhan chu company chuan a zirchiang dawn a ni, a ti. Maggi noodles a him tawk lo tia sawichhuahna, Uttar Pradesh-a test neih hmasak ber ami chu a expiry date pel tawh a ni tih thu company chuan a sawi bawk.

Mahse state danga Maggi noodle test neihah pawh hmehhan tel zat leh, lead awm zat pawh danin a phal chin aia sang hmuh a ni tho a, hei vang hian state panga Tamil Nadu, Gujarat, Uttarakhand, Jammu & Kashmir leh Assam -te chuan Maggi hralhchhuah hi an khap ve leh a ni.

Tamil Nadu chuan Maggi chauh ni lo, Wai Wai Xpress Noo­dles, Reliance Select Instant Noo­dles leh Smith and Jones Chic­ken Masala Noodles-te pawh hralhchhuah a khap bawk.

Ramchhunga Maggi noodles test thenkhattin safety standard an pha lo tih hriatchhuah a nih hnuin, Singapore sorkar chuan India ram aṭanga Maggi noodle an lakluh ṭhin chu nimin aṭang khan a titawp. Agri-Food and Veterinary Authority chuan an rama Maggi zuarte chu India ram aṭanga lalut rih lo turin a ngen a, India-a siam an lakluhte pawh test tir mek a ni, a ti. Test result hi hriatchian anih hma chuan Maggi lakluh leh hralhchhuah a khap rih a ni.