Jaya-i thubuai ngaihtuahna man Rs vbch 5
Karnataka sorkar chuan Tamil Nadu Chief Minister J Jayalalithaa-i leh a thurualpuia puh midang pathumte eiruk thubuai a ngaihtuah sak manah Tamil Nadu chu cheng vaibelchhe 5.11 a bill dawn.
Karnataka Law Minister TB Jayachandra chuan, "Bengaluru-a thubuai ngaihtuahna atan hian cheng vaibelchhe 5.11 chuang sen a ni a, hei hi Tamil Nadu sorkar kan dil leh dawn a ni," a ti.
Jayachandra chuan sate sorkarin Tamil Nadu hnenah hian Home department kaihhnawih thila senso pawh an bill tel dawn tih a sawi a, heng zingah hian thubuai ngaihtuah a nih laia Jayalalithaa-i security pekna atana an senso pawh a tel a ni. Home ministry chuan an senso zat hi an la chhut mek a ni.
Hetihlai hian Karnataka High Court-in Jaya-i thiam a chantirna chu Karnataka sorkar hian Supreme Court-ah khin let a tum thu a sawi.
Supreme Court chuan kum 2003, November 18 khan Jaya-i eirua puhna thubuai hi Bengaluru court-a ngaihtuah turin a sawn a, nikum Septemmber thla khan trial court chuan thiam loh chantirin kum li tang tur leh cheng vaibelchhe 100 chawi turin a ti a ni. Mahse Jaya-i chuan Karnataka High Court-ah khing letin, May 11 khan High Court chuan an puhnaah hian finfiahna a awm ṭha tawk lo tiin a tihtawp sak a ni.
Jaya-i hi a thubuai tihtawp a nih hnuah Tamil Nadu Chief Minister atan lakluh a nih leh tawh a, mahse a thubuaiah thiamloh chantir a nih khan MLA a nihna hlihsak a nih avangin thla ruk chhung ngeia assembly member atana thlan tlin leh a ngai dawn a ni. Hemi atan hian Radhakrishnan Nagar Assembly constituency-ah June 27 hian by-election neih a ni dawn a, he inthlana chuh turin nimin khan a hming a pe lut.