Indian tiin Geelani-a inziak

India lak aṭanga inlak­hran duhtu pawl, Hur­riyat hruaitu Syed Ali Shah Geelani chu nimin khan Srinagar-a passport thu­neitute hmaah in­lanin, a passport dilnaa na­tionality column-ah 'Indian' tiin a ziak.

Geelani hian Saudi Arabia-a a fanu damlo kan a duh a, hei vang hian a zinchhuah theihna turin passport a dil a ni. A tirah chuan a ram mi nihna ziahlanna turah hian a ziah duh loh vangin a dilna hi hnawlsak a lo ni tawh a ni.

Kum 88 mi, Geelani hian designated counter-ah a biometric data, finger prints leh iris scan-te pawh a thehlut tiin Region Passport Office official chuan a sawi. Form a thehluh hnua chanchin thar lakhawmtute a kawmnaah, Geelani chuan, "Indian nia piang ka ni lo a, tihluihnaa Indian ka ni," a ti. An pawl thupuangtu pawhin Geelani-a'n nationality column-a Indian tih a ziah thu hi sawiin, "Kashmir mi tu pawh chu a zin dawn chuan Indian passport nei tura tihluih a ni," a ti a, hei vang hian Geelani pawhin hei hi a zawm a ngai ve a ni, a ti.

Geelani-a'n passport a dil chungchang hi political party-te pawhin an buaipui hle a, Jammu and Kashmir-a ṭangrual sorkar siamtu, BJP chuan Geelani hnena passport pek a nih dawn chuan India dodal zawnga a lo chet tawhnaah ngaihdam dil phawt turin a phut a, mahse sorkar a siampui PDP chuan passport pek hi an thlawp thung.