Loneitute'n Sorkar laipui rawtna hnawl

Farm law siam thar duh lohna lantira nawrh huaihawt mek, loneitute leh sorkar laipui aiawhten Thawhlehni tlai khan inbiakna nei mah se, inremna an siam thei lo. Loneitute hian nimin khan Delhi-Haryana border-ah  meeting neiin, an kal zel dan tur an rel a ni. 

Thawhlehnia inbiakna an neihah sorkar lam chuan farm law chungchanga loneitute thil phut enfiah leh zirchiang tura member panga awmna committee siam a rawt a ni. Mahse hei hi duh loin, loneitute chuan hetianga committee din hian tun hma lam pawhin awmzia a nei ngai lo tih an sawi a, 'Tun hi committee lo din hun pawh a ni lo', tiin union minister pathumte nena meeting an neihnaah loneitu pawl aiawhte chuan an sawi. 

Loneitute hian farm law duh lohna lantirin ni sarih chhung nawrh an huaihawt tawh a, state hrang hrang aṭanga kalkhawmte chu Delhi border-ah an awm a ni. Hei bakah hian sorkarin  lungawi lohna lantirna atana an awm a phalsakna, Delhi khawdaia Burari ground-ah eng emaw zat an awm bawk. 

Congress party hruaitu Rahul Gandhi chuan sorkar laipuiin loneitute sum lakluh a letin a pung dawn tia a sawi chungchang chu bei letin, BJP sorkar hnuaiah loneitute sum lakluh hi a zahveah a tlakhniam laiin sorkar ṭhianṭha sumdawng hausate sum lakluh chu nasa takin a pung thung dawn a ni, a ti. 

Gandhi chuan hemi chungchang hi a twitter-ah ziakin, "Loneitute sum lakluh a letin a pung ang tiin an sawi a, mahse a zahveah zawk a tlahniam dawn a, sorkar ṭhianṭhate sum lakluh erawh a let li zetin a pung dawn a ni," tiin a tarlang a. Sorkar chu dawthei leh miretheite thil ruksakah a puh. Gandhi hian prime minister Narendra Modi-a'n a kaihhruai sorkarin loneitute harsatna neihte chinfel sak a, an sum lakluh a tihpun sak tur a sawina video clip pawh a dah tel bawk. 

Congress hruaitu hian BJP kaihhruai NDA sorkarin farm law thar a siam duh lohna lantira loneitu nawrh huaihawtte a thlawp thu hi a lo sawi tawh a, loneitute tana aw chhuah pui turin a farnu, Priyanka Gandhi Vadra nen pawh mipuite an lo ngen tawh bawk. 

Police-ten farm law duh lohna lantirtu, loneitute laka tharum an hmang chu Congress party chuan na takin a lo sawisel tawh bawk a, he dan thar siam hi sut turin sorkar laipui chu an phut a ni.