Eptu-ten Rajya Sabha Chairman rin tawk lohna put luh tum

Parliament thlasik ṭhutkhawm neih meka eptu pawl chuan Rajya Sabha Chairman, vice president ni bawk Jagdeep Dhankar chu House rorel a kaihhruai danah thlei bik nei nia puhin, a lakah rin tawk lohna No-confidence motion thehluh an tum.

Motion hi Constitution Article 67(b) tlawh hnuaiah put luh tum a ni a, hemi kawngah hian Congress chu a bul tumtu ber niin eptu pawl party dang Trinamool Congress, Samajwadi Party, Aam Admi Party leh INDIA bloc-a party hrang hrang aṭang an thlawp.

Rajya Sabha chairman laka motion put luh an tumah ina eptu party lam hian hming ziak ngai zat, party MP 50 hming ziak chu August thla khan an nei tling tawh nia sawi a ni. Mahse Dhankar lakah hian hmalak nghal mai duh loin an nghak rih deuh a ni. Mahse, Thawhṭanni a house a kaihhruai dan chuan ti lo thei loin a siam ta niin an tarlang.

House chairman paihthlak tumna resolution hi pawm tur chuan Rajya Sabha-ah member 50% in an thlawp a ngai dawn a ni. Hemi hnu hian Lok Sabha-in a pawmpui a ngai ve leh ang.

Hetih lai hian Parliament in hnih, Lok Sabha leh Rajya Sabha chu nimin pawh khan eptu lam aṭanga in aubuaina a la thlen nawn fo avangin tih tawp lailawk a ni leh bawk. An in auhbuaina chhan hi BJP national president, JP Nadda-a'n Congress leader Mallikarjun Kharge chu Forum of Democratic Leaders in the Asia-Pacific(FDL-AP) leader a nih anga Rajiv Gandhi Foundation aṭanga puihna lut sum dawng anga a puh vang a ni. Hei bakah hian Congress hruaitu Jammu and Kashmir en hrangah a puh tel bawk.