Karnataka CM hlui SM Krishna a thi

Karnataka chief mnister hlui Somanahalo Mallaiah Krishna, SM Krishna tia hriat lar chu nimin khan Bengaluru-a an chenna inah kum 92 mi niin a thi.

SM Krishna hi khawvel huapa Bengaluru chawilar tu nia sawi a ni a, IT sector-a a hna thawhte avangin Bengaluru chu India's Silicon Valley tih hial a nih phah a ni. Nikum January khan polictics a chawlhsan thu a puang a ni.

Karnataka chuan an CM hlui hi state pumah ni thum chhung sun ani dawn tih a puang a, vawiin hian Mandya District-ah vui a ni ang.

Bengaluru technology khawpuia siam tu SM Krishna hi Somanahalli Mandya district-ah May 1, 1932 khan piangin, a hun hmasa lamah Congress party ah awm mah se political career tawp lamah hian BJP a zawm a ni. Zirna lamah Maharaja College Mysuru aṭangin a graduate a, Law degree hi Government Law College Bengaluru aṭangin a zo leh bawk. Hemi hnu hian US ah zirna chhunzawmin Southern Methodist University Dallas, leh George Washington University ah Fulbright Scholar in a awm chhunzawm a ni.

Krishna political career hi 1962 aṭangin in ṭanin, Maddur assembly seat-ah independent in a hnehna hmasa ber a chang a, hemi ṭum hian Congress politician lian KV Shankar Gowda a hneh. Heta ṭang hian Karnataka assembly member a ni chhunzawm a, 1968-ah a hmasa ber atan Parliament member-ah thlan a ni bawk. 1999 khan a kaihhruaiin Congress chu state-ah rorelna siam puiin hemi ṭum hian Chief Minister a ni. 2004 aṭanga 2008 inkar ah khan Maharashtra Governor hna a chelh a 2009 ah Foreign Minister a ni leh bawk.