China-in India BUHFAI a lei

China chuan kum 30 dawn hnuah a vawi khatna atan India buhfai a lei leh ta niin industry official-te chuan an sawi. 

India hi khawvela buhfai thawn chhuak tam ber ram niin, China hi buhfai lakluh tam ber ram a ni ve thung. China-in ram dang aṭanga kum khata buhfai a lakluh hi ton maktaduai li vel a ni a, heti zat a lalut chung hian India ram aṭang chuan kum rei tak chhunga  a lei tawh lo a ni. 

Mahse tun hnaia hri leng avanga ram dangte'n China hnena an supply theih zat a tlem tak avang leh, India-in buhfai man nasa taka a tihtlawm avangin India buhfai hi a lei ta a ni. Rice Exporters Association president BV Krishan Rao chuan India buhfai an lei chu a quality ṭhat dante an hmu ang a, kum thar lamah chuan tam zawk an lei belh ngei a rin thu a sawi. 

Dec. aṭanga nakkum Feb thla chhungin China-ah hian buhfai ton 1,00,000 thawn a ni dawn tih official-te chuan an tarlang.