VHP-in Ram temple sa turin BJP a phût

Vishwa Hindu Parishad (VHP) chuan Prime Minister Na­dendra Modi-a kaihhruai BJP sorkar chu a sorkar chhung ngeiin a lo tiam tawh anga Ram temple sa turin a phut.

VHP chuan Modi-a sor­kar theihna chhan chu ram hma­sawnna tur bakah, thil pawi­mawh tak, Ayodhya-a Ram temple sak a tiam vang a ni, a ti. He buaina ber hi a chinfel loh chuan, Modi-a sorkar chuan a hmaa Atal Bihari Vajpayee-a kaih­hruai NDA sorkar ang bawk khan a nghawng a tuar leh ngei dawn a ni, a ti.

Hetihlai hian BJP President Amit Shah bakah party hruaitu dangte chuan Ram temple hi thiltih mai theh a nih loh thu an lo sawi tawh a, mahse hetichung hian sorkar lakah chuan beiseina an la neih reng thu VHP thupuangtu leh national secretary, Surendra Jain chuan a sawi.

Amit Shah hian Ram temple sak chungchanga thutlukna siam tur chuan an party-in Lok Sabha-ah thlawptu member 370 a neih a ngai tih lo sawi tawh a, Home Minister Rajnath Singh pawhin sorkar chuan hemi hian hmasawnna a dah pawimawh zawk tih a lo sawi bawk.

Surendra Jain chuan sakhaw hruaitu awmna committee chuan Ram temple sa tura nawr turin Prime Minister hmuh thuai an tum tih a sawi.

BJP thawhpui, Shiv Sena pawhin Ayodhya-a temple sak tum chungchang hi PM Modi chuan thla tina radio-a program a hman ṭhin, 'Mann Ki Baat' ah sawichhuak tawh tura an phut thu an tarlang tawh bawk.

BJP MP, Sakshi Maharaj chuan NDA sorkar lai ngeiin Ayodhya-ah Ram temple hi sak a ni dawn tih nimin khan a sawi. Maharaj chuan, "Tuna kan sak loh chuan engtikah emaw sak a la ni dawn tho. BJP hi kum khat chauh a la sorkar a, kum li dang hun kan la nei a ni," a ti. Ayodhya-a Ram temple sak tur chu khawvel hmun hrang hranga Hindu-te tana hmun pawimawh tak a nih tur thu a sawi bawk.