IIT-Madras leh HRD Ministry thuneitute a ko

IIT-Madras-a zirlai pawl pakhat, Ambedkar-Periyar Study Circle-in Prime Minister Narendra Modi leh a policy-te a sawisel avangin institute thuneitute'n an pawl an ṭhiahsak chungchang sawipui turin National Commission for Scheduled Castes (NCSC) chuan IIT-Madras leh Ministry of Human Resource Development (HRD) hotute a ko.

NCSC chuan IIT-Madras buaina chinfel dan kawng zawng turin institute-a acting director Professor K.Ramamurthy bakah HRD official-te koh an nih thu a sawi. NCSC chairman, PL Punia chuan, "IIT-Madras-a thil thleng, Ambedkar-Periyar Study Circle ṭhiah a nih dan hi thil zahthlak tak a ni. Hei vang hian NCSC chuan inrawlh a ṭulin a hria a, IIT Madras director leh HRD Ministry aṭangin report pawh a dawng tawh a ni," a ti.