State 14-ah Maggi noodle an khap

Mihring hriselna atana him tawk lo nia ngaih a nih vangin kar kalta Inrinni khan state panga chuan Maggi instant noodle zawrhchhuah an khap ve leh a, hengte nen hian Maggi hi state 14-ah khap a ni tawh.

Food Standards and Safety Authority of India (FSSAI) chuan Maggi hi lakir leh vek turin thupek tichhuak mah se, Karnataka, Uttar Pradesh leh West Bengal erawh chuan khapna thupek an la tichhuak duh lo.

Pune-a Maggi sample endik paruk zinga pathumah chuan danin a phal zat aia tam lead hmuh chhuah a ni a, hei bakah hian hmehhan pawh a tel tih hmuh a ni bawk.

Goa sorkar chuan an state-a Maggi sample an test-ah chuan thil ṭha lo hmuh a awm lo tih a sawi a, mahse hetichung hian state dangin an khap avangin hralhchhuah hi an khap ve rih dawn tih Chief Minister Laxmikant Parsekar chuan a sawi. Sample test an neih tawh chu ennawn turin Mysore-ah an thawn leh dawn tih a sawi.

State hrang hrangte chu an state-a Maggi sample-te enfiah vek tura hrilh an ni tawh a, hetihlai hian state ṭhenkhat chuan FSSAI in a him tawk lo nia a sawi avangin sample enfiah hmain zawrhchhuah khapna thupek hi an siam nghal.