Bihar CM-in Rahul Gandhi a hmu

Bihar legislative coun­cil inthlan neih tura thawh­ho leh seat insem dan chungchang sawipui turin nimin khan Chief Minister leh Janata Dal (United) hruaitu, Nitish Kumar chuan Congress vice president Rahul Gandhi a hmu.

Legislative council seat 24 inthlan neih turah hian party pahnihte hi thawhdun an tum a ni. Hetihlai hian Rashtriya Janata Dal (RJD) hotu Lalu Prasad pawhin Cong­ress president So­nia Gandhi hmuh a tum bawk.

Bihar-a assembly inthlan lo awm tura ṭangrual pawl din tum chu seat insem dan turah an la inrem theih loh avangin tihfel a la ni lo. JD(U) chuan Assembly seat 243 awmah RJD nen hian seat 100 ve vea insem a, a bak chu Congress leh an thawhpui dang party kutah pek a rawt a, mahse RJD chuan seat 145 tal chan a duh a, Congress pawhin seat 40 pek a phut bawk. Hei vang hian tun thlengin BJP paihtlak a nih theihna atana thawhho an tumna chu an la puitlin thei rih lo nia sawi a ni.

Mahse JD(U) pre­sident Sharad Yadav chuan September-Octo­ber vela assembly inthlan neih turah hian party pali- Congress, JD(U), RJD leh NCP te chu an thawkho dawn tih a sawi a, Lalu Prasad pawhin thawhho an tumna a tlawlh nia sawi chu thu dik lo a ni, a ti.