AP CM leh TRS MLA inbiakna audio tape tichhuak

Telangana legislative council inthlanna neih tura TDP-BJP candidate thlawp tura thamna sum pek an tum, Telangana legislator Elvis Stephenson leh Andhra Pradesh Chief Minister N Chandrababu Naidu inbiakna audio tape chu tihchhuah a ni a, mahse AP sorkar lam chuan CM aw a ni lo tih a sawi thung.

Audio tape hi a tlangzarhtu hriat a ni lo a, mahse Telugu news channel-ah tihchhuah a ni. Tape-ah hian Naidu hian nominated member, Stephenson chu a thlawp thu leh, an party nominate a vote chuan eng pawh thleng se a ṭan tlat tur thu a hrilh a ni.

May 31 khan Telugu Desam Party (TDP) MLA A Revanth Reddy chuan legislative council inthan neih turah Stephenson hi TDP-BJP candidate thlawp tura thlemin, thamna cheng nuai 50 pek a tum laiin Anti-Corruption Bureau (ACB) chuan Reddy hi in a man a ni. ACB hian Stephenson hnen aṭanga complain a dawn avangin Reddy manna tur hian thang a kam a ni. A thurualpui, Sebastian Harry leh Uday Simha-te pawh man an ni bawk.

Telangana-a rorellai, Telangana Rashtra Samithi (TRS) hruaitute chuan thamna inpek chungchanga a bultumtu ber chu CM Naidu a ni tih sawiin, ani pawh thubuai siamsak an phut thu an sawi. Naidu hian Stephenson bakah TRS MLA dangte pawh a lo be tawh niin an tarlang.

Mahse TDP chuan audio tape hi TRS sorkarin a siamchawp niin an sawi a, state chhung hmun hrang hrangah TRS hruaitute laka lungawi lohna an lantir a ni. Telangana Chief Minister K Chandrasekhar Rao chu Naidu-a dikna chanvo palzut a, a hming tihchhiatsakah an puh bawk.