Rahul Gandhi-a'n Sambhal buaina tuartu chhungkua kawm

Lok Sabha-a Leader of Opposition Rahul Gandhi chuan Thawhlehni khan Sambhal, Uttar Pradesh-a pawikhawihna thleng tuartu chhungkuate chu a chenna hmun, Delhi-a 10 Janpath ah a kawm. An tana dikna pek leh a theih anga puih a tum thuin a thlamuan. He hunah hian Wayanad MP leh Congress general secretary ni bawk Priyanka Gandhi Vadra chuan a tel pui.

Rahul Gandhi leh Priyanka Gandhi te hian December 4 khan Sambhal Mosque-a buaina chhuak thlithlai tumin Uttar Pradesh an lo pan tawh a, hemi ṭum hian Ghazipur border-ah UP police ten an lo dang a ni.

Congress chuan an inkawmna chungchang hi X ah tarlangin," LoP leh Congress general secretary leh MP ni bawk Priyanka Gandhi te chuan Sambhal-a in beihna thleng tuartute an kawm. He buaina hi BJP politics tenawm tak khelh vanga thleng a ni" tiin,"Kan ṭangrual a nih chuan he pawikhawihnain inhuatna a thlen hi hmangaihna leh in unauna hmangin kan um bo thei a ni" tiin an sawi zui bawk.

Uttar Pradesh sorkar chuan pawikhawihna thleng tuartute tlawh chu Gandhi leh Vadra te hi lo phalsak tawh lo mah se, Congress chuan harsatna tawktuten an dikna an hmuh theihna tura beih zel a, hmalak chhunzawm zel an tum thu an tarlang. Gandhi ngei pawh hian he thil thleng hi,"Constitution kalh a ni" tiin a lo sawi hial tawh bawk.

Sambhal-a Mughal hunlaia sak tawh Mosque zirchiang tur hian court chuan mi a tir a, hei hi duh lo in tualchhung mi eng emaw zat chuan an mi tirhte hi lo dangin an buai zui a ni. Buaina chhuak vang hian mi pali in nunna an chan a, hliam tuar eng emaw zat an awm bawk a ni.