NIA-in Punjab leh Haryana-a hmun 9 an dap

National Investigation Agency(NIA) chuan misual pawl nena inthlunzawmna neite an chhuina kal zelah, nimin khan Punjab leh Haryana-ah hmun pakua an dap.

NIA hian intelligence lam aṭanga an thu dawn bawhzuiin beihpui thlak hna hi an kalpui a, Punjab-ah hmun pariat leh Haryana-ah hian hmun khat an dap a ni. Thla hmasa lamah khan agency hian Punjab, Haryana leh Uttar Pradesh-ah hmun pakua a lo dap tawh bawk a, hemi ṭum hian Davinder Bambiha pawl nena inthlunzawmna nei an chhui ber a ni.

Helpawl leh misual thawhpuina kaihhnawihah NIA hian chenna in eng emaw zat an lo dap tawh bawk. An beihpui thlakna aṭang pawikhawihna atana hman nia hriat mobile phone, digital device, banking transaction bakah property document te chu an lo man tawh bawk.

Heng beihpui thlakna hi Ministry of Home Affairs in a thurawn a pek anga kalpui a ni. Dan kalha thil tihna thleng, a bikin ralthuam, ruihhlo leh puak thei thil India rama tawlh luh a nih ṭhin naa inhnamhnawihte dap chhuahna tura an hmalakna a ni. Pawl hrang hrangin India rama firfiakte chetna thlentirna tur hian sum pawh an khawn khawm nasa hle nia sawi a ni.