FSSAI-in noodle leh a anpui test turin a ti

Nestle India siam, Maggi instant noodles-ah danin a phal chin aia tam lead leh hmehhan (MSG) hmuh a nih avanga state hrang hranga zawrh khap a nih hnuin, Food Safety and Standards Authority of India (FSSAI) chuan firm dang siam noodles, pasta leh macaroni-te pawh taksa tan a him tawk em tih enfiah tura test turin nimin khan thupek a tichhuak.

FSSAI chuan Nestle Maggi noodle chi hrang hrangte hi mihring ei tan a him tawk lo tia sawiin khapna thupek a tichhuak tawh a, company pawh a thilsiamte hi lakir turin a hriattir a ni.

State hrang hrangah Maggi noodle hi enfiah mek a ni a, tam takin zawrh an khap tawh bawk. Test an neih tawh ṭhenkhatah chuan Maggi-a lead awm zat hi a him chin nia sawi ni mah se, a tam zawkah chuan danin a phal chin a pel a ni.

India ram hmun hrang hranga Maggi buaipui a nih hnuin, United Kingdom (UK) pawhin kar hmasa khan an rama Maggi noodle-a lead awmzat a test ve nghal. Mahse Nestle UK siam Maggi an test-ah hian buaina a awm loh thu leh, fimkhur thuhlaa test mai an nih thu an sawi.

Nepal sorkar pawhin an rama Maggi noodles lakluh leh zawrhchhuah a khap tawh a, Pathianni khan Bahrain chuan Nestle India siam Maggi noodles chu an rama lakluh a khap bawk.

FSSAI in company dang siam noodles, pasta leh macaroni test tura a tihte hi ITC, Indo Nissin Food Ltd, GSK Consumer Healthcare, CG Foods India, Ruchi International leh AA Nutrition Ltd siamte an ni. Enfiah tura tih zingah hian CG Foods India siam Wai Wai noodles leh bhujiya chicken-te pawh an tel.