Delhi Law Minister man a ni
Delhi Law Minister Jitender Singh Tomar chu nimin zing khan law degree lem siama puh a nihna thubuaiah Delhi Police-te'n an man.
Police lam chuan Thawhṭanni zan khan Tomar-a hi law degree a neih dan chungchangah inbumna hmanga thiltia puhin FIR ziahluh a ni, an ti.
Delhi-a rorellai, Aam Aadmi Party sorkar chuan minister man a nih tur chungchang hi engmah a hre lawk lo a, nimin zinga man a nih hnu khan Chief Minister Arvind Kejriwal-a chuan Delhi Secretariat-ah emergency meeting a ko.
Delih Police Commissioner BS Bassi pawhin Tomar man anih chungchangah hian engmah hriat a nei bik lo tih a sawi a, meeting-a a awm laiin police-te hian an lo man niin a sawi. Police-te hian Tomar hi a office a awm lai an man hnuah Hauz Khaz police station-ah an hruai a, heta ṭang hian Vasant Vihar-a police station dangah an sawn leh a ni. Heng police station te hi uluk taka ven niin, pawn lamah pawh a hungna dah a ni.
AAP chuan Tomar hi hriattirna engmah awm lawk loa man a nih thu sawiin, a mawhphurtuah BJP kaihhruai sorkar laipui a puh. AAP chuan minister manna tur thupekah hian sorkar laipui aiawhtu, Delhi Lieutenant Governor Nadeem Jung-a'n a hming a sign niin a sawi bawk.
Central-a BJP sorkar chuan LG kaltlangin Delhi sorkar chu rahbeh a tum tiin AAP hruaitu Kumar Vishwas chuan a sawi a, hriattirna engmah awm lawk loa firfiak ang maia minister man a ni chu a dem thu a sawi.
Sorkar hnathawkte ruat chungchanga Delhi CM leh LG inkara inepna awm chuan ziaawm lam a la pan lo thei lo. Chief Minister Arvind Kejriwal-a'n Anti-Corruption Branch-ah Bihar-a police officer panga-te a dah hnuin, Thawhṭanni khan LG hian ACB-a inspector pasarih a sawn a, ACB hotu atan joint commissioner of Delhi Police a ruat nghal bawk.
Jung hian ACB hotu tan Joint Commissoner MK Meena a ruat a, Meena hi Joint Commissioner of New Delhi range-a awm mek a ni a, LG chuan ACB additional charge hi a pe tel a ni. Hetihlai hian ACB hotu hna hi SS Yadav chuan a la chelh mek a ni.
Deputy Chief Minister Manish Sisodia chuan LG Jung-a'n joint commissioner post a siam thar chu sawiselin, appointment a pek dante sawifiah turin a phut.