Yoga duh lo chuan India a chhuahsan thei ang : BJP MP

Central-a BJP kaihhruai NDA sor­karin Yoga Day compulsory-a dah a tum leh, zirna in hrang hrangah 'Surya Namaskar' leh Yoga-te telh a tumna chu pawl eng emaw zatin an dodal.

Yoga leh Surya Namaskar dodaltute hi chhangin, BJP MP Yogi Adityanath chuan Yoga duhlo chuan India ram an chhuahsan thei ang a ti a, hei bakah hian Surya Namaskar dodaltu chu tuipuiah an zuangthla thei ang, tiin a sawi bawk.

Hindutva hruaitu hian he thu hi Thawhṭannia Mata Annapurna Mandir, Varanasi-a inkhawm neihah a sawi a, he hmun hi Prime Minister Narendra Modi-a parliament constituency huam chhunga mi a ni.

Adityanath chuan, "Lord Shankar kha Yoga bul ṭantu a ni a, he ram chhung khawi hmunah pawh hian a awm a ni. Chuvangin Yoga leh Lok Shankar duhlotu chuan India ram hi a chhuahsan thei ang," a ti. Surya Namaskar dodaltu pawl hrang hrang pawh a sawisel a, ni (sun) chu khawvela chakna hrang hrang inṭanna bul a ni tiin, Surya Namaskar chu Yogic act peng pakhat a ni, a ti. June 21-a Yoga Day hman tu chu khawvel ram 43 chuangin an hmang dawn tih a sawi bawk. Hemi ni hian ramchhung hmun hrang hrangah yoga camp buatsaih a ni ang.

Hetihlai hian All India Muslim Personal Board chuan Yoga chu Hindu sakhaw tihdan phung pakhat a ni tiin, ramchhunga zirna in hrang hranga sorkarin Surya namaskar compulsory-a dah a tum chu rampum huapin dodalna an lantir dawn tih a sawi a, sorkar chu a thupek sut leh turin an phut bawk.