Congress CM conference neih a ni

Nimin khan New Delhi-ah Congress Chief Minister mee­ting neih a ni a, UPA chair­person Sonia Gandhi-in meeting hi a ho. Congress party hian state pakua-ah sorkarna an siam mek a ni.

Congress CM mee­ting-ah hian tun hnaia BJP kaihhruai NDA sorkarin pass tuma a nawr mek, eptu lamin an dodal Land Acquisition Bill chung­chang leh NDA eco­nomic policy hrang hrangte an sawiho.

Nimina meeting hi kum 2014 Lok Sabha inthlanpui neiha Cong­ress kaihhruai United Progressive Alliance (UPA) an chak loh hnua Congress CM-te'n meeting an neih lehna hmasa ber a ni a, Congress hruaitu pawimawhte'n an hmanpui.

Sonia Gandhi chuan BJP-in ram mipuite tana hlauhawm tak game an khel mek a ni tiin, "BJP rorelna hnuaiah chuan tunhmaa la tih ngai loh angin mi pakhat kutah thuneihna dah a ni. Prime Minister chuan sorkar ṭha tak siam angin a inlantir a tum a, hetihlai vek hian a thawhpuite chuan chi leh sakhaw inkara inhuatna thlen thei thil leh thu pawi tak tak an sawichhuak reng thung a ni," a ti.

Congress President chuan an party CM-te chu mipuite tana ṭhatna turah chuan ṭha taka central sorkar thawhpui turin a chah a, hemi rual hian Modi-a sorkar chetdan chu mipuite ṭhatna tur a nih loh chuan an chachhuah ang a, an lungawi lohna pawh an lantir zel dawn tih a sawi.

Prime Minister hlui Manmohan Singh leh Finance Minister hlui P Chidambaram-te pawhin meeting ah hian thu an sawi bawk.