One Nation One Election bill pharh hun sawn hla

Sorkar laipui chuan Parliament-a constitutional Amendment bill thar, Lok Sabha inthlan leh Assembly inthlan a ruala buatsaih theihna tur, 'One Nation One Election(ONOE)' bill pharh a tum hun chu sawnhlain, tunkar tawp lamah a pharh zawk dawn nia sawi a ni.

Constitution(One hundred and Twenty-Ninth Amendment) Bill, 2024, 'ONOE' tia hriat lar hi union cabinet-in a pawm tawh avangin sorkar lam hian nimin khan Lok Sabha-ah a pharh nghal mai dawn nia sawi a ni. Bill hi union law minister Arjun Ram Meghawal-a'n a pharh beisei a ni bawk. Mahse a dawn hnaih takah sorkar lam chuan nimina Lok Sabha-a a pharh tum hi a ṭhulh leh a, kar tawp lamah a pharh zawk dawn nia sawi a ni leh ta thung. Hei hi ONOE chungchang ngaihtuah hmaa supplementary demands for grants batch hmasa ho tihfel pawh a duh vang niin an sawi.

Parliament thlasik ṭhutkhawm hi Decmeber 20 thleng neih tura tih a ni a, session tawp lamah ONOE bill hi pharh a tum ta zawk nia ngaih a ni.

Ram pum huapa a ruala inthlan buatsaih a nih theih dan ngaihtuaha zirchiang tura din, president hlui Ram Nath Kovind kaihhruai high level committee chuan ONOE hi party 39 in an thlawp a, a thlawp lo hi party 15 chauh an ni tiin a sawi. Tunhma, kum 1951 leh 1967 inkarah khan inthlan hi a ruala neih ṭhin a nih thu pawh a tarlang bawk.