RG Kar case : Pawikhawihtu bail phalsak vangin doctor-te nuar leh dawn

West Bengal khawpui, Kolkata-a RG Kar Medical College and Hospital-a doctor zirlai hmeichhia pawngsual leh thah a nih chungchang chhuinaa pawikhawihnaa inhnamhnawih nia puh man, mi pahnite chu court-in bail-a chhuah phalsak avangin doctor-ten ni 10 chhung nawrh huaihawt leh an tum.

Doctor zirlai pawngsual leh thah thubuaia man, RG Kar Medical College and Hospital principal hlui Sandip Ghosh leh Tala police station officer in-charge Abhijit Mondal chu Sealdah court chuan bail-a chhuah a phalsak a ni.

West Bengal Joint Platform of Doctors (WBJPD) chuan vawiin aṭangin lungawi lohna, sit-in demonstration hi Kolkata-a hmun laili laiah neih nghal an tum. Doreena Crossing-ah December 26 thleng nawrh hi huaihawt an tum tih pawl hruatute chuan an sawi. Joint covenor Dr Punyabatra Gun chuan," He thil thleng chungchangah hian CBI chu chargesheet kimchang a rang thei ang bera thehlut turin kan ngen nghal a ni," a ti.

Sealdah court-in bail a phalsakte hi August 9-a pawngsual leh mi thahna a inhnamhnawiha rinhlelh te niin, CBI in ni 90 chhunga an laka chargcheet thehluh tur an theh luh hman loh vanga bailna hi phalsak nia tarlan an ni. He thil thleng avang hian WBJPD te hian Inrinni liamta khan CBI office CGO Complex Salt Lake ah kawng zawh an lo huaihawt tawh bawk.