Priyanka Gandhi-i'n 'Palestine' tih chuang bag ak

Congress MP Priyanka Gandhi Vadra chuan Palestine mipui te tawrhna a tuarpui zia lantirnan, Thawhṭanni khan Parliament-ah 'Palestine' tih in ziahna bag a ak.

Priyanka Gandhi Vadra bag-ah hian Palestine tih a inziah bakah, Palestine emblem pawh a chuang. Palestine te inpumkhatna entir tua hman dawnfawh lem pawh a chuang bawk. June thla ah khan Vadra hian Israel prime minister Benjamin Netanyahu chu Gaza Strip-a beihpui an thlak danah a kaihhruai sorkar chu rawng taka hma la ṭhin tiin a dem thu hi a lo sawi tawh a ni.

Congress General secretary hian Israel in Gaza a beihpui a thlak chungchangah hian thawm a lo nei fo tawh a, Gaza-a pawikhawihna hi ti tawp turin nasa taka hmalak a ṭul tawh niin a tarlang. Tun hnaiah pawh Palestine chungchang sawipuiin, Palestinian Embassy-a charge d'affaires Abed Elrazeg Abu Jazer a hmu.

BJP lam chuan Priyanka bag ah hi sawiselin, midang tih lawm tuma a chetna niin an puh ve thung. BJP thupuangtu, Sambit Patra chuan Palestine thlawpna lantir dan uchuak tak tiin, Gandhi chhungkua chu hetianga thil ti ṭhin, an thil phut leh tih lawm tumte lantirna bag nena kal kual ṭhin tiin a sawi zui. "Ram an hmangaihzia lantirna bag an ak ngai lo a, hei hi an chakloh ṭhinna chu a ni," tiin a sel zui.