Lok Sabha-ah One Nation One Election bill pharh; Eptuten mi pakhat tih lawm tumna tiin an sawisel

Prime minister Narendra Modi kaihhruai sorkar laipui chuan nimin khan Lok Sabha rorel inkhawmah ram puma a ruala inthlan buatsaih a nih theihna tur, 'One Nation One Election' bill a pharh. Eptu lam chuan ram danpui kalh leh mi pakhat tih lawm tumna a ni tiin an sawisel nasa hle thung.

Union law minister Arjun Ram Meghwal chuan One Nation One Election bill tia sawi, Constitution (One Hundred and Twenty-Ninth Amendment) Bill, 2024 hi Parliament lower house-ah a pharh a ni. Mahse eptu lam, INDIA bloc MP-te chuan nasa taka sawiselin, Constitution in nghahna palzutna tiin, Joint Parliamentary Committee (JPC) hnena thawn an phut.

Congress hruaitu leh Chandigarh MP, Maish Tiwari chuan Law Minister bill pharh hi ram danpui innghahna palzutna leh house-a an lo ngaihtuah mai tur pawh a ni lo a, 'dictatorship dinna tur kawng' a ni tiin bill pharh pawh hi ti tawp nghal tura a phut thu a sawi. Samajwadi Party hruaitu, MP Dharmendra Yadav pawhin Tewari thlir dan chu thlawpin, Lok Sabha member-te chu Constitution siamtute ang khawpa thil hria leh thiam an ni lo tiin, bill hi a thlawp loh thu a sawi ve bawk. Trinamool Congress MP Kalyan Banerjee pawhin ONOE bill chu Constitution palzutna a ni, a ti. He bill thlawp lotu dang, AIMIM MP Asaduddin Owaisi chuan state tinten ro inrelna tura dikna chanvo an neih leh parliamentary democracy palzutna a nih thu a sawi ve bawk.

Bill pharhtu, Law Minister Meghal chuan ONOE bill hi state sorkar thuneihna laka inrawlh an tumna a ni lo tih sawiin, ram danpui innghah chhan pawh khawih danglam a ni dawn lo, a ti. Eptu lamin an phut angin, bill hi chiang zawka zirchianna lo nei turin Joint Parliament Committee-a thawna rawt ve leh bawk a ni.

ONOE bill hi zirchian leh tura Joint Parliament Committee kuta dah hi rin lawk dan a ni tho a ni. He committe hi House-a party mala lian ber, BJP chuan kaihruaiin seat pawh a ngah ber dawn a, eptu MP-te chu an party seat neih dan azirin ruat a ni bawk ang.