PM Modi-a'n Kuwait a tlawh dawn

Prime minister Narendra Modi chuan December 21-22, 2024 hian Kuwait ram a tlawh dawn a, kum 43 chhunga India prime minister zinga Kuwait ram tlawh hmasa ber a ni ang. Tun thla chhunga Saudi Arabia a tlawh tum chu a hun tih khawtlai anih avangin nakkum lamah a kal zawk ang.

Kuwait ram hi Gulf Cooperation Council (GCC) ram zingah Modi-a'n PM a nih hnua a la tlawh loh awmchhun a ni. Kum 2022 khan tlawh a lo tum tawh a, mahse Covid hri leng vangin a ṭhulh leh a ni. Kuwait hian GCC president dinhmun a chelh mek a ni. Tun thla tir lam khan Kuwait foreign minister Abdullah Ali Al-Yahya chu India ramah rawn zinin, PM nen pawh meeting an nei a ni.

Prime Minister Modi hian September thla khan New York-a United Nations General Assembly neih denchhenin Kuwait Crown Prince, Sheikh Sabah Khaleh Al-Hamad Al-Sabha chu meeting a neihpui a, hei hi ram pahnih hruaituten meeting an neih dunna hmasa ber a ni. Meeting-ah hian ram pahnih hruaitute hian energy leh food security an inpuih tawn danah an lungawi thu te, inlaichinna zau leh thuk zawk neih an duh thute an sawi. India chuan Kuwait nena inlaichinna a neih chu a dah pawimawh hle tih Modi chuan a sawi. Crown Prince hnenah hian Kuwait rama India mi awmte ṭha taka enkawl an nih avangin lawmthu pawh a hrilh bawk. Kuwait-a ram dang mi awm mek zingah hian Indian an tam ber a ni.