Loneituten Punjab-ah nawrh huaihawt dawn

Loneitute chuan sorkar laka an thil phut nawrna atan vawiin hian Punjab-ah rel kawng dangin 'Rail Roko' huaihawt an tum.

Loneitu pawl hruaitu, Sarwan Singh Pandher chuan Rail Roko hi chhun dar 12 aṭangin darkar thum chhung huaihawt an tum thu leh, Punjab mipuite pawh an nawrh huaihawt hi thlawp vek tura a sawm thu a sawi. Punjab mipuite chuan loneitute harsatna tawh mek chinfel a nih theihna atan an beihpui a ngai a ni, a ti.

Pandher chuan sorkar laipui chu loneitute harsatna chinfel sak duh lohah a puh. "Pawl hrang hrangte chuan kan nawr mek a, kan lungawi lohna hi state sorkar lakah a ni lo," tiin loneituten sorkar laipui nawrna atana an nawrh huaihawt chu ni 309 a tlin tawh thu a sawi.

Nimina Lok Sabha inkhawmah pawh Congress MP Manickam Tagore chuan loneitute thil nawr tih hlawhtlin phuta chaw ngheia nawrh huaihawt mek, loneitu pawl hruaitu Jagjit Singh Dallewal chungchang sawi ho phutin adjournment motion notice a lo pu lut bawk. Dallewal hian ni 21 chaw a nghei tawh a, a hriselna dinhmun pawh a ngaihtuahawm tawh hle a ni. Pandher chuan, "Dallewal chungah eng pawh a thleng a nih chuan, sorkar laipui chu a mawhphurtu a ni ang," a ti.