Sorkar laipui Yoga-ah tihluihna a awm lo ang a ti

Muslim pawl hrang hrangte'n June 21-a sor­karin Yoga Day hmang vek tura a tihluih an hlauh thu an sawi hnuah, External Affairs Minister Sushma Swaraj leh Home Minister Rajnath Singh-te chuan yoga practice vek tura intihluihna a awm loh thu an sawi.

Home Minister chuan, "Yoga hi practice duh chuan an ti ang a, a duh lo tan intihluihna a awm lo," a ti.

Yoga Day-ah hian Delhi-a Rajpath-ah minute 35 chhung hun hman an ni dawn a, hetah hian school naupangte pawh teltir an ni ang. Mahse he hunah hian zinglama ni(sun) biakna ṭawngṭaina hun hman ṭhin, Surya Namaskar chu telh a ni dawn lo nia sawi a ni.

Sorkar laipuiin zirna in-a yoga leh surya na­mas­kar kalpui a tum chu Muslim lamin an sawisel a, All India Mus­lim Personal Law Board chuan school-a com­pulsory-a dah tumna chu dodal zel an tum thu an sawi tawh.

Hetihlai hian sorkar laipui chuan June 21-a International Yoga Day hman tum chu theihtawpa chawilar a tum a, union minister hrang hrangte chu hemi ni hian an zinchhuak a nih pawhin an zinna hmuna ṭheuh yoga camp hi buatsaih turin a ti. BJP chuan state unit zawng zawngte chu district tina yoga camp buatsaih vek turin a ti bawk.