Certificate lem siama puh Delhi law minister Tomar a bang A thlaktu atan Kapil Mishra ruat nghal a ni

Law degree lem siama puh a nih avanga man, Delhi Law Minister Jitender Singh Tomar chu Delhi court-in ni li chhung police custody-a awm tura a tih hnuah minister a nihna aṭangin a bang.

Delhi Chief Minister Arvind Kejriwal-a chuan Tomar-a banna thehluh hi a pawmsak nghal a, nimin khan AAP sorkar-a Law Minister thlaktu tur hian Delhi Jal Board Chairman Kapil Mishra chu ruat nghal a ni.

Tomar hi Law degree leh BSc degree lem siamah puh a ni a, Thawhṭanni khan IPC section 420, 467, 471 leh 120B hnuaiah inbumna hmanga puhin a lakah FIR hi ziahluh a ni a, Thawhlehni khan police-te'n a office-a a awm laiin an man a ni.

Minister man a nih hnu hian AAP chuan meeting vawi eng emaw zat a ko nghal a, Delhi Deputy Chief Minister Manish Sisodia chuan Tomar man tum a nih chungchangah hriattirna engmah pek lawk a ni lo a, firfiak ang maiin sawi lawk loin man a ni, a ti. Delhi-a AAP sorkarin eirukna umbo tura beihpui a thlak meknaah tih bahlah tumin minister hi man a ni tiin, he thila mawhphurtuah BJP kaihhruai sorkar laipui a puh. Mahse Union Home Minister Rajnath Singh chuan Tomar man a nih chungchangah hian sorkar lapuiin inrawlhna a nei lo a, dan dik tak lekkawh tumna zawk a ni, a ti.

BJP, Congress leh political party dangte chuan Tomar man a nih hnu hian Delhi sorkar hnenah minister a nihna aṭanga bang turin an lo phut bawk.

Law Minister aṭanga bang ta, Jitender Singh Tomar hi nimin khan a degree neihte a lem a nih leh nih loh enfiah turin Uttar Pradesh-a Faizabad-ah hruai a ni. Tomar hian Dr Ram Monohar Lohia Avadh University aṭangin BSc degree a nei niin a insawi a, hei hi police-te'n an enfiah dawn a ni. Hei bakah hian LLB degree a neihna nia a sawi, Munger, Bihar-a Bishwanath Singh Institute of Legal Studies-ah pawh enfiah turin police-te chuan hruai an tum bawk.

Degree lem siama puh a nih avanga Delhi minister man a nih hnu hian, NDA sorkar-a Human Resource Development Minister Smriti Irani-i degree chungchang pawh sawichhuah a ni. Irani-i hian kum 2004 leh 2014 Lok Sabha inthlanpui neih dawna nomination paper a thehluha education qualification a tarlan dan a inang lo a, hei hian sawizui pawh a hlawh hle. Communist Party of India (Marxist) Polit Bureau member Brinda Karat chuan, "Tomar chu thil dik lo tia puh a nih avangin man a ni a, eng vangin Smirti Irani chungah pawh hetianga tih a nih ve loh?" a ti. National Students Union of India president Roji M John chuan, ''Delhi Police-te chuan BJP minister, affidavit dik lo hmangte pawh an man ve ngei kan beisei," tiin a sawi.

Irani-i hian kum 2004 inthlanpui neih dawna a nomination paper-a educational qualification-ah “B.A. 1996 Delhi University (School of Correspondence)" tiin a ziak a, mahse 2014 inthlanpui dawna a paper thehluhah “Bachelor of Commerce Part-1, School of Open Learning (Correspondence), University of Delhi-1994.” tiin a ziak thung. The Representation of the People Act, 1951, hmangin Irani lakah hian Delhi Court-ah thubuai thehluh a ni a, June 24 hian a thubuai hi ngaihtuah a ni ang.