FSSAI blacklist-ah food brand dang telh an ni

Food Safety and Standards Au­tho­rity of India (FSSAI) in mihring tana him tawk loa ngaih, Nestle India siam Maggi chi hrang hrangte lakir tura a hriattir hnuah, company dang Starbucks, Kellogg leh Venky-te pawh a blacklist-ah a dah belh leh.

FSSAI chuan Starbucks, Kellogg leh Venky-te thil siam chi 500 vel chu enfiah a nih hnuin, heng ei turahte hian heavy metal, caffeine leh iron level-te a sang hle tih hmuhchhuah a ni. Blacklist-a dah belh zingah hian Tata Starbucks ei tur siam te, Kellogg cereal te, Venky-in arsa aṭanga ei tur a siamte leh Ranbaxy multi-vitamin te a tel.

ITC, GSK Consumer, Ruchi Inter­national leh Indo Nissin siam noodles, pasta leh macaroni-te chu enfiah turin FSSAI hian thupek a siam tawh bawk a ni.

Maggi noodles khap a nih avang hian Nestle India plant, Maulinguem, Bicholim-a contract worker 500-te dinhmun a derthawng hle a, company chuan contract worker-te hi hnathawhna hmuna kal tawh rih lo turin a hriattir tawh a ni. An zinga eng emaw zat chu kum li lo thawk tawhte an ni.

United Kingdom-a food regulator pawhin Indian official-te hnen aṭangin Maggi noodles test-na result kimchang a dil. UK-a Maggi Masala variant hi India aṭanga lakluh a nih thu Nestle chuan a sawi.