Eptu MP-ten Amit Shah thil sawi vangin lungawi lohna lantir

19th December, 2024

Eptu pawl,INDIA bloc MP eng emaw zat chuan union home minister Amit Shah-a'n B.R. Ambedkar chungchang a sawi dan chu in hmuhsitna a ni tiin, nimin khan Parliament complex-ah lungawi lohna an lantir. Congress party president Mallikarjun Kharge leh Rahul Gandhi te pawh an tel. Shah chu a thusawi chungchangah thupha chawi turin an phut.

MP lungawi lohna lantirte hi Congress, DMK, RHD, the Left, AAP, member te niin, Parliament kawtah hian Ambedkar thlalak te kengin an pungkhawm a ni. Thawhlehni pawh khan Congress chuan Rajya Sabha-a constitution debate neih ṭuma Amit Shah thu sawi danah khan BJP leh RSS chuan Ambedkar huatna nasa tak an nei tih a lantir tawh niin an sawi bawk.

Congress party hruaitu Rahul Gandhi hian Manusmriti ringtu tan chuan Ambedkar hi a thlawp theih loh a ni tiin, Congress general secretary-in-charge communication Jairam Ramesh chuan X ah Shah thu sawi video hi a dah chhuak bawk. Shah hian, "Ambedkar hming lam reng mai hi in cheina ang ah kan ngai a, pathian hming lam reng vanga vanram awm ve tura in ngaihna ang chauh a ni" tiin a sawi.

Congress president Kharge chuan BJP leh RSS chuan tricolour hi an dodal hle tih an ti lang fo tih sawiin, Constitution of India aiin Manusmriti hman chu an duh zawk tih hi an lantir niin a sawi."Modi sorkar hnuaia minister-te chuan keimah angmi vaibelchhe tam tak tan chuan Babasahed Ambedkar hi pathian tluk deuh thaw a ni ti an hriatthiama ngai. Heng Dalit, tribal, Backward classes, minority leh mi retheite tan hi chuan min chhandamtu ang tluk a ni reng ang" tiin X-ah a sawi zui bawk.

Home Minister chuan Thawhlehnia Rajya Sabha ṭhutkhawm ah khan Congress chu na taka beiin, Constitution chu anmahni thu thu a tih danglam theih niah an ngai tiin a chhal ve thung. Heng thil thleng hrang hrang avanga house chhunga member-te in auhbuaina a thlen chhunzawm reng avang hian nimin pawh khan Parliament inkhawm chu rorel theih lohin ṭum eng emaw zat tih tawp lailawk a ni leh. Thlasik Ṭhutkhawm hi December 20 thleng neih tura ruahman a ni.