'One Nation, One Election' panel-ah Priyanka Gandhi rawt

Lok Sabha-a Thawhlehnia pharh tak, 'One Nation, One Election' bill zirchiangtu tur, Joint Parliamentary Committee (JPC)-a tel turin Congress party chuan Wayanad MP, Priyanka Gandhi Vadra a rawt.

Parliament-a pharh a nih hnuah sorkar laipui chuan ONOE bill hi JPC zirchian turin a rawt a, mahse hei hi House speaker Om Birla chuan a la nemnghet lo. December 20-a Parliament thlasik ṭhukhawm a zawh hmain, sorkar chuan committee member turte hi a tihfel hman rin a ni.

JPC-ah hian Lok Sabha aṭangin member 21 leh Raya Sabha aṭangin member10, an vaini mi 31 an awm dawn a ni. Parliament-a seat an neih dan azirin political party hrang hrang aṭangin member hi ruat a ni ang.

Congress party chuan JPC-ah hian member pali a thawh thei dawn nia sawi a ni a, Priyanka bakah Manish Tewari, Rajya Sabha MP - Sukhdev Bhagat leh Randeep Surjewala te a rawt bawk a ni.

JCP member turte ruat fel an nih hunah, ni 19 chhunga report thehluh tura tih an ni ang. Mahse a hun hi pawhsei sak theih a ni bawk. Hemi chhung hian committee chuan statekholder hrang hrangte a kawmkual dawn a, an zingah MP dangte, constitutional expert, judge hlui, lawyer leh Election Commission member te pawh an tel dawn. State assembly speaker ngaihdan leh mipui nawlpuite ngaihdante pawh an la tel bawk ang.