India leh China aiawhte inbiakna nei

India leh China aiawhte chuan ramria buaina sosang thei tih ziawmna turin inbiakna an nei leh.

Nimina inbiakna hi Beijing-ah neih niin, national security advisor Ajit Doval leh China foreign minister Yang Yi te chuan Line of Actual Control-a remna leh muanna kalpui a nih zel theihna atana hma lak ngaihna hrang hrangte an sawidun.

Doval hian Special Representative inbiak ṭum 23 hmang turin Thawhlehni khan China a thleng a, 2019 a inbiakna neih hnuhnungber aṭanga kum nga liam hnuah inbiakna hi mumal taka neih leh vawikhatna tur a ni. Kumin October 12-a Eastern Ladakh-a ramri aṭanga ram pahnih sipaite an inhnuhdawh hnu khan ramri ah boruak ṭha leh rualmuang a awm theihna turin India leh China hian kawng hrang hrangin hma an la reng a ni.

Ram pahnih aiawhte inbiak naah hian thawh dunna ṭha leh harsatna awm chinfel ngai hrang hrang an sawi dun a ni. China pawhin Russia-a BRICS summit, October thlaa neih ṭuma PM Modi leh President Xi ten thawh dunna ṭha neih an in huam thu an sawi chu puitlin ngei an tum thu an tarlang.

India leh China inkar hian ziawm lam pan zelin ramriah pawh sipai chu ralthuam nena hnuhkir vek an ni tawh a, patrolling chauh kalpui a ni tawh. Hemi bakah hian Special Representative(SR) in kawmna neih kaltlang hian insumdawn tawnna te, kawng hrang hranga thawhdunna ṭha zawk neih zel theih dan tur an sawi bawk.