Amit Shah thusawi dan avangin eptu leh BJP MP te intibuai

Union home minister Amit Shah-a'n Thawhlehnia Rajya Sabha rorel inkhawma BR Ambedkar chungchang a sawi dan avangin eptu party-ten lungawi lohna a lantir chhunzawm zel. Nimina Parliament pawn lama eptu leh rorellai MP-te innawr buainaah BJP MP pahnihin hliam an tuar nia sawi a ni.

BJP MP hliam zinga pakhat, Pratap Chandra Sarangi chuan Parliament a lut tur chu Congress hruaitu, Lok Sabha-a Leader of Opposition Rahul Gandhi-a'n a lo nam tluk vanga hliam niin a sawi. BJP hian Rahul Gandhi lakah thubuai thehluh an tum.

Mahse Gandhi chuan BJP lam hian Parliament a lut tur chu dangin an lo nam zawk niin a sawi thung. Lungawi lohna lantir turin dikna chanvo an nei a, thil thlen dan dik tak chu camera-ah a lang vek ang, a ti thung.

Congress party president Mallikarjuin Khawrge chuan Lok Sabha speaker hnenah lehkha thawnin, Parliament pawn thil thleng chu chhui chiang tura thupek siam turina ngen. Congress hruaitu chuan BJP MP-ten an lo nam bet a, hei vang hian amah pawhin a balance hlohin leiah ṭhut a ngaih phah a, a khup zai tawh pawh chu a nat leh phah tih a sawi.

Amit Shah hian Congress party a beihnaah "Ambedkar hming lam reng mai hi in cheina angah kan ngai a, pathian hming lam reng vanga vanram awm ve tura in ngaihna ang chauh a ni" tiin a sawi. Congress lam chuan B.R. Ambedkar chungchang a sawi dan chu in hmuhsitna a ni tiin, Parliament kawtah lungawi lohna an lantir a ni.

INDIA bloc MP-ten Nilania Parliament kawta lungawi lohna an lantirnaa Ambedkar thlalak an ken chu BJP chuan social media lamah lo siam danglamin, Ambedkar thlalak chu US billionair George Soror thlalakin an lo thlak sak. Thlalak bakah an thu ziakte pawh an lo tih danglamsak bawk. Congress general secretary KC Venugopal chuan BJP post siam hi sawiselin, thil zahthlak leh Dr Ambedkar zah lohna leh hmusitna a ni, a ti. Dr Ambedkar tana an ding chu BJP tan chuan thil nuihzatthlak ang mai a ni, tiin India ram tana Ambedkar pawimawhna leh ropuina chu BJP chuan tih nep an tum niin a puh bawk.

Congress president Kharge chuan prime minister Narendra Modi chuan Ambedkar zahna tlemte pawh a nei a nih chuan Amit Shah chu a ban ngei tur a ni a ti. Hetih lai hian PM Modi chuan Congress hi bei let ve thungin, Dr Ambedkar ropuina tih chhetu nia puhin SC/ST te an ti zak a ni, a ti. Shah pawhin a thusawi hi an lakawi niin a sawi ve bawk a ni.