Trump-a'n chhiah lak tih sânah India a vau

US president-elect Donald Trump chuan India-in America thil thawn luhah chhiah sang tak a lak avangin, India aṭanga bungrua lak luhah chhiah tih san veah a vau.

China nena an insumdawn tawnna chungchanga zawhna a chhannaah Trump chuan hemi chungchang hi a sawilang a, "Chhiah min chawitir chuan, min chawi tir zat kan chawi tir ve ang," a ti. India leh Brazil chuan US thil siam-ah chhiah la hnem ram zingah an tel tih a sawi bawk.

"An tih anga tih let ve hi a pawimawh. India hian 100% min chawi tir chuan, engmah chawi tir loin kan awm ringawt dawn em ni? Bicycle an rawn thawn lut a, keini pawhin bicycle kan thawn a, mahse anni chuan 100 leh 200 percent min chawitir a ni. India hian chhiah a chawitir sang lutuk, Brazil pawh a ni tho. Min chawi tir duh a nih chuan a ṭha vek e, mahse chumi ang zat chu kan chawi tir ve tawh ang," tiin Mar-a-Lago a press conference a neihah Trump chuan a sawi a ni.

Donald Trump-a'n commercial secretary atana a thlan, Howard Lutnick pawhin Trump kaihhruai US sorkar tharah chuan an tih anga tih let ve tih chu an kal dan tur pawimawh tak a ni tel dawn tih a sawi.