RG Kar Hospital case : Doctor nu leh pain HC-ah ngenna thlen leh

West Bengal khawpui, Kolkata-a RG Kar Medical College and Hospital-a doctor zirlai pawngsual leh thah tak nu leh pa chuan Ningani khan Calcutta High Court-ah an fanu chunga pawikhawhna rapthlak thleng chungchang hi chhui ṭha leh turin ngenna an thlen ṭha leh.

Pawikhawihna thleng chhui meknaah finfiahna ṭha takte a awm mumal loh avangin, doctor boral ta nu leh pa chuan a bul aṭanga chhui thar leh an duh a ni. Justice Thirthankar Gohso chuan an lawywer hnenah petition an thehluhah hian he thubuai chhui mektu, Central Bureau of Investigation (CBI) chu ziak tel turin a ti. Karleh Thawhṭanniah petition hi ngaihtuah a ni ang.

Kumin August 9-a RG Kar Medical College and Hospital-a doctor zirlai pawngsual leh thah a nih chungchang chhui hna hi CBI kuta hlan a ni a, mahse ni 90 chhungin CBI hian pawngsualtu nia puh, Sanjay Roy lakah chuah chargesheet a la theh lut. He pawikhawihna thlenga kaihhnawiha man tel, RG Kar Medical College principal hlui, Sandip Ghosh leh Tala police station officer in-charge Abhijit Mondal lakah chargesheet an theh luh loh avangin, anni pahnih bail-a chhuah phalsak an ni tawh bawk. Ghost hi Hospital chhunga pawikhawihna thlenga finfiahna awmte tichhiaha puh a ni a, police officer hi ruang hmuh a nih hnuah pawh FIR thehlut tur lo tih khawtlai sakah puh a ni bawk.